O Grupo AXA sumouse ás seguintes iniciativas de Nacións Unidas dentro da súa estratexia de sostibilidade e para facer fronte ás consecuencias do cambio climático:
Principios para a Sostibilidade en Seguros (PSI), asinados por AXA e outras 29 compañías aseguradoras en xuño de 2012 no Cumio de Río +20. Os catro principios PSI garanten un marco común para integrar criterios medioambientais, sociais e de goberno corporativo no negocio asegurador. AXA é un dos membros fundadores (2006) e tamén está no consello da iniciativa PSI (2013).
Principios para o Investimento Responsable de Nacións Unidas (PRI), asinados por AXA IM (2007), AXA Private Equity (2008), AllianceBernstein (2011) e Grupo AXA (2012). Trátase dunha gran iniciativa global que busca promover o investimento responsable integrando criterios medioambientais, sociais e de goberno corporativo nas decisións dos investidores e xestores de fondos.
Plataforma Mundial para a Redución do Risco de Desastres (UNISDR). En 2013, AXA entrou a formar parte do grupo asesor do sector privado da plataforma. Esta iniciativa busca coordinar a redución de desastres e asegurar as sinerxías en todas as accións encamiñadas á redución de desastres cunha atención especial á prevención de riscos.
Pacto Mundial de Nacións Unidas, ao que AXA se uniu en 2002, e que pretende que as empresas e organizacións asinantes adecúen a súa actividade e estratexia con dez principios aceptados universalmente nas áreas de dereitos humanos, laborais, medio e loita contra a corrupción.
“Protección do Clima: a plataforma dos dirixentes empresariais”, iniciativa subscrita polo Grupo AXA en 2008 e que consiste nunha plataforma voluntaria para empresas que queren demostrar o seu liderado na loita contra o cambio climático. Apoiada de forma conxunta polo Pacto Mundial de Nacións Unidas, o Consello Empresarial Mundial para o Desenvolvemento Sostible (WBSCD) e o Programa de Nacións Unidas para o Medio (UNEP).
